ഇങ്ങനെയും ബജറ്റ് അവതരിപ്പിക്കാം!

കെ. ബാബുരാജ്
Published on Saturday, March 14 2015
img

ജനാധിപത്യത്തിന്റെ ശ്രീകോവില്‍ എന്ന് നിയമസഭയെകുറിച്ച് ആലങ്കാരികമായി പറയുമെങ്കിലും അത്രക്കൊന്നും പരിപാവനമായ ഒന്നല്ല അവിടം എന്ന് നാട്ടുകാര്‍ക്ക് പണ്ടേ അറിവുള്ളതാണ്. എം.വി രാഘവനും സീതിഹാജിയുമൊക്കെ സാമാജികരായിരുന്ന കാലത്ത് അടിപിടിയും മുണ്ടുപൊക്കി കാണിക്കലും മറ്റും നടന്ന സ്ഥലമാണ് കേരള നിയമസഭ. വാച്ച് ആന്‍ഡ് വാര്‍ഡ് തലവന്റെ കരണക്കുറ്റി നോക്കി വീക്കിയിട്ടുണ്ട് എം.വി രാഘവന്‍. എം.എല്‍.എമാര്‍ തമ്മില്‍ കയ്യാങ്കളിയും നടന്നിട്ടുണ്ട്. സഭയുടെ അകത്ത് അംഗങ്ങള്‍ക്കുള്ള പ്രത്യേക അവകാശാധികാരം മൂലം അനന്തര നടപടികളൊന്നും ഇതിന്മേല്‍ ഉണ്ടാകാറില്ല.

കെ.എം മാണി ബജറ്റ് അവതരിപ്പിക്കുന്നത് തടയാന്‍ പ്രതിപക്ഷവും മാണിയെ കൊണ്ടു തന്നെ അവതരിപ്പിക്കാന്‍ ഭരണപക്ഷവും നടത്തിയ ബലാബലമാണ് കേരള നിയമസഭയെ ഇന്ന് ദേശീയ തലത്തില്‍ തന്നെ ശ്രദ്ധാ കേന്ദ്രമാക്കിയത്. ബലാബലത്തില്‍ ആരു ജയിച്ചു എന്ന അവകാശ വാദങ്ങളാണ് പിന്നാലെ നടന്നു കൊണ്ടിരിക്കുന്നത്. ആരു ജയിച്ചാലും തോറ്റത് പൊതുജനം തന്നെ. മദ്യക്കോഴ വിവാദത്തില്‍ മുങ്ങിത്താഴുന്ന സാഹചര്യത്തിലാണ് മാണി ബജറ്റ് അവതരിപ്പിക്കരുതെന്ന ആവശ്യം പ്രതിപക്ഷം മുന്നോട്ടു വെച്ചത്. മാണി തന്നെ ബജറ്റ് അവതരിപ്പിക്കുമെന്നും സമ്മര്‍ദ്ദത്തിനു വഴിപ്പെടില്ലെന്നും സര്‍ക്കാര്‍ പ്രഖ്യാപിച്ചു. സഭക്കകത്തു എം.എല്‍.എമാരെയും പുറത്തു പാര്‍ട്ടി പ്രവര്‍ത്തകരെയും അണി നിരത്തി ബജറ്റ് അവതരണം തടയാന്‍ എല്‍.ഡി.എഫ് കോപ്പുകൂട്ടി. സ്വാഭാവികമായും പൊലിസിന്റെ കായികബലത്തില്‍ ഊന്നി ബജറ്റ് അവതരിപ്പിക്കാന്‍ ഭരണപക്ഷവും തീരുമാനിച്ചു.

ഇതോടെ തലസ്ഥാനത്ത് ഇന്നുവരെ ഉണ്ടാകാത്ത യുദ്ധസമാന ദൃശ്യങ്ങള്‍ കാണാന്‍ ജനങ്ങള്‍ക്ക് അവസരം ലഭിച്ചു. ദൃശ്യമാധ്യമങ്ങള്‍ ഇതു ലൈവ് ആയി നല്‍കി രംഗം പരമാവധി കൊഴുപ്പിച്ചു. ആവുന്നതൊക്കെ ചെയ്യുമെന്നും ജനം പൊറുക്കണമെന്നും പ്രതിപക്ഷ ഉപനേതാവും സി പി എമ്മിന്റെ സംസ്ഥാന സെക്രട്ടറിയുമായ കൊടിയേരി ബാലകൃഷ്ണന്‍ മുന്‍കൂര്‍ ജാമ്യം എടുത്തിരുന്നു. വാച്ച് ആന്‍ഡ് വാര്‍ഡ് എന്ന് പേരിട്ട കേരളാ പൊലിസിനെ ഇറക്കി അവരുടെ മുഷ്ടി ബലത്തില്‍ മാണി സഭയിലെത്തി ബജറ്റ് പ്രസംഗത്തിന്റെ ഏതാനും പേജുകള്‍ വായിച്ചു. ധനമന്ത്രിയുടെ സീറ്റില്‍ നിന്ന് പിറകോട്ടു പോയി യു.ഡി.എഫ് എം.എല്‍.എമാരുടെയും വാച്ച് ആന്‍ഡ് വാര്‍ഡിന്റെയും സംരക്ഷണ വലയത്തിലാണ് മാണി വായിച്ചത്. തുടര്‍ന്ന് ബജറ്റ് താന്‍ സഭയുടെ മേശപ്പുറത്തു വെക്കുന്നതായി മാണി പറഞ്ഞു. ഈ സമയത്ത് മേശപ്പുറത്ത് സി.പി.എമ്മിന്റെ യുവ എം.എല്‍.എയെ കാണാമായിരുന്നു. സ്പീക്കറുടെ കസേര വലിച്ചെറിഞ്ഞ് നടുത്തളത്തില്‍ എത്തിച്ചിരുന്നു. സഭാ നടപടികളുടെ ലൈവ് കാസ്റ്റിങ് ഉണ്ടായിരുന്നതിനാല്‍ എല്ലാം കണ്ടാസ്വദിക്കാന്‍ ജനങ്ങള്‍ക്ക് കഴിഞ്ഞു.

സ്പീക്കറുടെ അസാന്നിധ്യത്തില്‍ ആയിരുന്നു മാണിയുടെ ബജറ്റ് വായന. നിയമസഭയുടെ ചരിത്രത്തിലാദ്യമായാണ് സഭയുടെ നാഥനായ സ്പീക്കര്‍ ഇല്ലാതെ ഒരു ബിസിനസ് നടന്നത്. നടപടി ക്രമങ്ങള്‍ ഒന്നും തന്നെ പാലിക്കപ്പെട്ടില്ല. വായന കഴിഞ്ഞപ്പോള്‍ മാണിക്ക് മുത്തവും യു.ഡി.എഫ് അംഗങ്ങള്‍ക്ക് ലഡുവും. പ്രതിപക്ഷത്തെ ഒരു ഡസനിലേറെ അംഗങ്ങള്‍ ആശുപത്രിയിലേക്ക്. സഭക്കകത്തും പുറത്തും യുദ്ധം കഴിഞ്ഞ പ്രതീതി. സംസ്ഥാനത്തിന്റെ ഒരു വര്‍ഷത്തെ ധനകാര്യ ഇടപാടുകളാണ് വാര്‍ഷിക ബജറ്റ്. അതിന്റെ അവതരണം ഇങ്ങിനെ ആയ സ്ഥിതിക്ക് തിങ്കളാഴ്ച ആരംഭിക്കുന്ന ബജറ്റ് ചര്‍ച്ചയും ഇതേ മാര്‍ഗത്തില്‍ ആകാനാണ് സാധ്യത. അടുത്ത മേയില്‍ പൊതുതെരഞ്ഞെടുപ്പ് നടക്കാനിരിക്കെ ഉമ്മന്‍ചാണ്ടി സര്‍ക്കാരിന്റെ അവസാനത്തെ സമ്പൂര്‍ണ ബജറ്റാണിത്.

കെ.എം മാണി ധനമന്ത്രി എന്ന നിലയില്‍ അവതരിപ്പിക്കുന്ന പതിമൂന്നാമത്തെ ബജറ്റ്. ഇനിയൊരു ധനമന്ത്രി ആയി ബജറ്റ് അവതരിപ്പിക്കാന്‍ മാണിക്ക് അവസരം കിട്ടുമോ എന്ന് പറയാനാവില്ല. അത്രക്ക്‌മേല്‍ മാണിയുടെ പ്രതിച്ഛായ തകര്‍ന്നു കഴിഞ്ഞു. അര നൂറ്റാണ്ടിന്റെ തിളക്കമാര്‍ന്ന രാഷ്ട്രീയ പാരമ്പര്യം അവകാശപ്പെട്ടിരുന്ന മാണി ഒരു മദ്യമുതലാളിയുടെ ആരോപണം വന്നപ്പോള്‍ കോഴയുടെ പര്യായമായി മാറി. മാണിയെ തൊലിയുരിച്ചു പ്രതിപക്ഷ നേതാവ് വി.എസ് അച്യുതാനന്ദന്‍ നിയമസഭയില്‍ നടത്തിയ പ്രസംഗം ജനങ്ങള്‍ ബൈബിള്‍ പോലെ വായിക്കുന്നു. തെരുവില്‍ കുട്ടികള്‍ വരെ പറയുന്നു, മാണി കുറ്റവാളിയാണെന്ന്.

പൊലിസ് പോലുള്ള മര്‍ദന ഉപകരണങ്ങള്‍ ഉണ്ടായിരിക്കെ ഏതൊരു സര്‍ക്കാരിനും ചെയ്യാന്‍ കഴിയുന്ന ഒന്നാണ് കേരള നിയമസഭ കണ്ടത്. ബജറ്റ് എങ്ങിനെയും അവതരിപ്പിക്കാം എന്ന പുതിയ പാഠം ഇതിലൂടെ ലഭിക്കുന്നു. ജനാധിപത്യത്തിന്റെ ഏറ്റവും വലിയ ശക്തിസ്തംഭം ധാര്‍മികത ആയാണ് കഴിഞ്ഞ കാലമത്രയും കണക്കാക്കി പോന്നത്. കഴമ്പുള്ള ആരോപണം വന്നാല്‍ അധികാര സ്ഥാനത്തുള്ളവര്‍ രാജി വെച്ച് മാറി നില്‍ക്കുക. അന്വേഷണത്തിലൂടെ അഗ്‌നിശുദ്ധി തെളിയിച്ച് തിരിച്ചു വരിക. എ.കെ ആന്റണിയെ പോലുള്ളവര്‍ അങ്ങിനെ തിരിച്ചു വന്നവരാണ്. പക്ഷേ , ആന്റണിയുടെ പിന്‍ഗാമിയായി വന്ന ഉമ്മന്‍ചാണ്ടി ഈ കീഴ് വഴക്കം തെറ്റിച്ചു. കുഞ്ഞാലിക്കുട്ടിയെയും കെ.കെ രാമചന്ദ്രനെയും കെ.പി വിശ്വനാഥനെയും രാജിവെപ്പിച്ച ഉമ്മന്‍ചാണ്ടി ആരോപണങ്ങളുടെ മലവെള്ളപ്പാച്ചില്‍ വന്നിട്ടും രാജി വെച്ചില്ല. എത്ര അപമാനിതനായാലും രാജിവെക്കില്ലെന്ന് പരസ്യമായി പ്രഖ്യാപിക്കാനും മടിച്ചില്ല. അപ്പോള്‍ പിന്നെ എന്തിനീ മാണിസാര്‍ മാത്രം രാജി വെക്കണം?

Comments