Flash News
വാർത്തകൾക്കും,പരസ്യങ്ങൾക്കും ബന്ധപെടുക:9895854501,9895046567 ಸುದ್ದಿ ಹಾಗೂ ಜಾಹೀರಾತಿಗಳಿಗಾಗಿ ಸಂಪರ್ಕಿಸಿರಿ 9447435412...

30 കോടി രൂപയുടെ വ്യാജ ചെക്ക്: നയാബസാർ ഗ്യാസ് ഏജന്‍സി ഉടമയായ യുവതിയടക്കം രണ്ടുപേര്‍ അറസ്റ്റില്‍

Saturday, December 31 2016
img

മഞ്ചേശ്വരം (www.asiavisionnews.com): 30 കോടി 53 ലക്ഷത്തി മൂവായിരം രൂപയുടെ വ്യാജ ചെക്ക് ബാങ്കില്‍ സമര്‍പ്പിച്ച കേസില്‍ രണ്ടുപേരെ മഞ്ചേശ്വരം എസ്.ഐ പി. പ്രമോദ് അറസ്റ്റ് ചെയ്തു.

മംഗല്‍പാടി നയാബസാറിലെ ഇന്ത്യന്‍ ഗ്യാസ് ഏജന്‍സി പ്രൊപ്രൈറ്റര്‍ ഇ. സനില (35), മഞ്ചേശ്വരത്തെ പ്രകാശ് (50) എന്നിവരാണ് അറസ്റ്റിലായത്.

കാസര്‍കോട് ഒന്നാംക്ലാസ് മജിസ്‌ട്രേറ്റ് കോടതിയിൽ ഹാജരാക്കിയ ഇരുവരെയും പിന്നീട് റിമാണ്ട് ചെയ്തു.

കര്‍ണാടക ഗവ. ഇന്‍ഷുറന്‍സ് കമ്പനിയുടെ ബാങ്ക് ഓഫ് മൈസൂറിന്റെ ബംഗളൂരു ശാഖയിലെ വ്യാജ ചെക്കാണ് ഫെഡറല്‍ ബാങ്കിന്റെ ഉപ്പള ശാഖയില്‍ നല്‍കിയത്. ബംഗളൂരില്‍ സ്വന്തമായുണ്ടായിരുന്ന സ്ഥാപനം കത്തിനശിച്ചതിനാല്‍ ഇന്‍ഷുറന്‍സ് കമ്പനിയില്‍ നിന്നും നഷ്ടപരിഹാരമായി ലഭിച്ച തുകയാണിതെന്നാണ്് ബാങ്ക് അധികൃതരോട് പറഞ്ഞിരുന്നത്.

വലിയ തുകയ്ക്കുള്ള ചെക്കായതിനാല്‍ മൈസൂര്‍ ബാങ്കിന്റെ ബംഗളൂരു ശാഖയില്‍ ബന്ധപ്പെട്ടപ്പോള്‍ അതേ ചെക്ക് നമ്പറില്‍ പതിനായിരം രൂപ നേരത്തെ അനുവദിച്ചിരുന്നതായി കണ്ടെത്തി. അതോടെ തങ്ങള്‍ക്ക് ലഭിച്ചത് വ്യാജ ചെക്കാണെന്ന് മനസ്സിലായ ഫെഡറല്‍ ബാങ്ക് ഉപ്പള ശാഖാ മാനേജര്‍ മഹേഷ് മാധവന്‍ മഞ്ചേശ്വരം പൊലീസില്‍ പരാതി നല്‍കുകയായിരുന്നു.

ഗ്യാസ് ഏജന്‍സി നടത്തിയ വകയില്‍ സനിലക്കും ഭര്‍ത്താവിനും വന്‍തുക കടബാധ്യതയുണ്ടായിരുന്നു. ഇത് പരിഹരിക്കാനായി പ്രകാശനാണ് ചെക്ക് നല്‍കിയതെന്ന് സനില പൊലീസിനോട് പറഞ്ഞു. ചെക്കില്‍ തുക എഴുതിയത് സനിലയാണ്.

ബംഗളൂരുവിലെ ഇന്‍ഷുറന്‍സ് കമ്പനി ഏജന്റാണ് തനിക്ക് വ്യാജ ചെക്ക് നല്‍കിയതെന്ന് പ്രകാശന്‍ പൊലീസിനോട് പറഞ്ഞു. സമാന രീതിയില്‍ നേരത്തെ ഒരു ലക്ഷം വീതം രണ്ടുതവണ തട്ടിയെടുത്തതായാണ് പൊലീസ് സംശയിക്കുന്നത്. വ്യാജ ചെക്ക് നിര്‍മ്മിച്ചതെവിടെയെന്ന് പൊലീസ് അന്വേഷിച്ചുവരുന്നു.

Comments